ХУМАН ГЕСТ ОД САШКА КУЗМАНОВА – ИЗМАМИ НАСМЕВКИ ОД СЕДУМ ДЕВОЈКИ

Сашка Кузманова од Кавадарци – голем хуманитарец, со огромно срце и душа, денеска со љубов донираше 7 перики од природна коса на 7 девојки од Кочани, кои настрадаа во пожарот на 16 март.

Потребни се три недели трпеливост и труд да се изработи една таква перика, а Сашка сите седум ги донираше денеска на девојките во фризерското студио „Фешн“.

Покрај овој хуман чин, Сашка Кузманова, сопственик на „Инфинити Лајф Кс“ – Кавадарци, изработува перики и за онколошките пациенти – лицата што боледуваат од чумата на 21 век, која за жал зема сѐ поголем замав.

„Едноставно нема зборови со кои би се опишала таа насмевка кога ќе се стави периката“ – рече за „Радио Кочани“ и додаде:

„Се надевам дека овие девојки сега ќе имаат поголема самодоверба, а нивната насмевка што нѐ исполнува, денес ја добивме. На сите повредени им посакувам побрзо оздравување. Јас секогаш ќе бидам рамо до рамо со сите оние на кои им е потребна мојата помош.“

Ова е уште еден пример и показател како треба да се функционира и како треба да се однесуваме сите ние кога на некого навистина му е потребна мала помош, која за некого многу значи и ќе измами голема насмевка.