Градоначалникот Љупчо Папазов организираше прием за гостите учесници на 10. Меѓународен фолклорен фестивал „Ѓурѓовденски обичаи“

Претставниците на фолклорни ансамбли од Црна Гора, Србија, Босна и Херцеговина и од Словенија, коишто учествуваат на десеттото издание на Меѓународниот фолклорен фестивал „Ѓурѓовденски обичаи“, имаа прием кај градоначалникот на Општина Кочани Љупчо Папазов.

Во пријатна атмосфера, разменија впечатоци и мислења за самиот фестивал, на кој некои од нив учествуваат по петти пат. Притоа тие го истакнаа фестивалскиот континуиран раст и развој и се заблагодарија што со помош на организаторот и раководител на Фолклорниот ансамбл „Љупчо Сантов“, Александар Тошев, имаат можност да градат значајна културна мрежа.

Фестивалот „Ѓурѓовденски обичаи“ продолжува со фолклорно дефиле и концерт во Оризари, ѓурѓовденски игри во Масалница и презентација на традиционални ѓурѓовденски обичаи.