В понеделник СОУ „Љупчо Сантов“, во вторник СОУ „Гошо Викентиев“: Кочани подготвено за матурските дефилеа и прослави

Кочани на 18 и 19 мај  ќе живее во знакот на матурските свечености и последните средношколски мигови на генерацијата 2026.

В понеделник, со почеток во 18 часот и 30 минути, учениците од четврта година од СОУ „Љупчо Сантов“ ќе го одржат последниот класен час, по што ќе следува свечено дефиле низ училиштето.

Матурантите ќе влезат од задниот дел на објектот, а симболично ќе излезат од предната страна, означувајќи го преминот кон ново животно поглавје. Вечерта ќе продолжи со матурска прослава во ресторанот „Амор“.

Празничната атмосфера продолжува и во вторник со матурантите од СОУ „Гошо Викентиев“.

Последниот класен час е закажан за 18 часот, по што генерацијата ќе продефилира низ училишниот двор.

Во 19 часот свеченото дефиле ќе продолжи во Паркот на Револуцијата, каде традиционално ќе биде прогласен и ученикот на генерацијата.

Заокружувањето на средношколските денови за учениците од СОУ „Гошо Викентиев“ е резервирано за ресторанот „Аледар“, каде од 20 часот ќе започне матурската вечер исполнета со музика, емоции и незаборавни спомени.