Вие сте на официјалниот портал на Радио Кочани.
Оризопроизводителите од Грдовци годинава ќе сеат помалку ориз – започнаа подготовките за новата сезона
Годинава оризопроизводителите од селото Грдовци ќе сеат помалку ориз затоа што цените на ѓубривата се зголемени, а и оризот од минатат година се уште им стои во амбарите.
Инаку, Владата донесе мерки за ограничување на цените на ѓубривата, со цел заштита на земјоделците и стабилизирање на пазарот.
Според одлуката, неорганските ѓубрива ќе може да се продаваат со најмногу 5 проценти трговска маржа, додека кај органските, органоминералните и биостимулаторите маржата е ограничена на 10 проценти.
Од Државниот пазарен инспекторат информираат дека досегашните анализи покажале значително повисоки маржи – од 15 до 60 проценти, а кај дел од производите и до 70 проценти.
Дополнително, трговците кои имаат залихи набавени по стари цени се обврзани веднаш да ги намалат продажните цени за 10 проценти.
Мерките стапуваат на сила веднаш и ќе важат до крајот на мај. Надлежните велат дека одлуката е донесена по засилени контроли и разговори со увозниците, откако биле забележани нови поскапувања.
Целта е да се обезбеди доволна понуда и да се спречи неоправдан раст на цените, во услови на глобална криза на пазарот со ѓубрива.