Спортската сала при ООУ „Никола Карев“ – Кочани ќе го носи името „Кочанските Ангели“ во чест на трагично загинатите млади

Училишниот одбор на ООУ „Никола Карев“ – Кочани на својата последна седница донесе одлука спортската сала при училиштето да го добие името „Кочанските Ангели“. Овој симболичен чекор е направен во трајно сеќавање и чест на младите животи што прерано згаснаа во трагедијата што се случи во дискотеката „Пулс“.

Со оваа иницијатива, училиштето изразува длабока почит, љубов и солидарност кон семејствата на настраданите и целата кочанска заедница. Именувањето на спортската сала има за цел да го пренесе значењето на заедништвото, хуманоста и вредноста на животот, особено во простори како спортските сали, каде младите ја изразуваат својата енергија, тимски дух и посветеност.

Одлуката е доставена до Советот на Општина Кочани за понатамошна постапка. Името „Кочанските Ангели“ ќе остане траен симбол и потсетник на болката, но и на силата на заедницата да сочува сеќавања и да гради со сочувство.