Општина Кочани започнува соработка со Ресурсниот центар на родители на деца со посебни потреби – подружница Кочани

Со цел да се овозможи поголема ефикасност во реализацијата на заедничките цели, в. д. градоначалникот на Општина Кочани Венко Крстевски потпиша меморандум за соработка со Здружението на граѓани Ресурсен центар на родители на деца со посебни потреби – Скопје, подружница Кочани.

Активностите на Ресурсниот центар, на кои заедно со Општина Кочани ќе им биде даден акцент, се развивање на програма за социјални услуги во заедницата, што подразбира давање на помош и нега на лица кои по различни основи имаат намалени функционални и инструментални функции во нивното секојдневие. Услугата за помош и нега во домот ќе биде наменета за лица со намален функционален капацитет, како стари лица, лица кои не можат да се грижат самите за себе, лица со попреченост  и др.

Ресурсниот центар на родители на деца со посебни потреби е лиценциран давател на социјалната услуга помош и нега во домот и нуди можност за бесплатна обука на негуватели што ќе ја испорачуваат оваа услуга.