Вие сте на официјалниот портал на Радио Кочани.
Со музика, хуманост и силна порака за заедништво, во Паркот на Револуцијата во Кочани се одржа хуманитарен настан посветен на Јорданчо Џамов и 63-те жртви од трагедијата што длабоко го потресе градот и целата јавност.
Голем број граѓани присуствуваа на настанот, каде што беа организирани модна ревија, хуманитарна продажба на фустани и богата музичка програма. Собраните средства ќе бидат наменети за изградба на спомен-обележјето „Патека на бесконечноста“, како и за поддршка на семејства од ранливи категории.
Професорката Сања Ристевски истакна дека Јорданчо Џамов како личност оставил неизбришлива трага кај своите професори, соученици и пријатели, а неговата добрина и човечност засекогаш ќе останат во сеќавањата на оние што го познавале.
Во рамки на настанот беа промовирана книгата посветена на прерано починатиот Јорданчо Џамов, како и хуманитарно здружение. Книгата е дело на авторките Ружица Блажева и Натали Ајтовска. Книгата претставува сведоштво за еден краток, но исполнет живот кој оставил силна и трајна трага во срцата на многумина.
Неговата сестра, Розета Блажева, емотивно се обрати пред присутните, нагласувајќи дека е тешко да се пронајдат вистинските зборови за личност каква што бил Јорданчо, но дека неговата љубов, насмевка и добрина продолжуваат да живеат преку спомените на неговите најблиски.
Посебни емоции кај публиката предизвикаа музичките настапи на македонската музичка ѕвезда Каролина Гочева, како и на ОМУ „Ристо Јуруков“ од Кочани, чии изведби дополнително ја збогатија вечерта исполнета со почит, тага и надеж.
Во знак на сеќавање и почит кон жртвите, кон небото беа пуштени 63 балони, симболично оддавајќи почит на секој од згаснатите животи.
Настанот беше организиран од семејството и пријателите на Јорданчо Џамов, кои испратија порака дека споменот, солидарноста и хуманоста треба да продолжат да живеат и во иднина, како потсетник дека љубовта и заедништвото се најсилниот одговор на секоја болка.