Вие сте на официјалниот портал на Радио Кочани.
Симеон Иванов – нашироко познат само како Канго е македонски рок – музичар и гитарист, поет, сликар и основач на културното движење „Мактеон“, кое ја промовира македонската нација, култура, јазик, а особено античко-македонското наследство на денешниот македонски народ. Канго беше познат по својот стил на свирење и изглед на легендарниот гитарист Џими Хендрикс.
Симеон Иванов – Канго е роден во Кочани на 2 ноември 1951 година. Овде го завршил основното и средното образование. Дипломирал на правниот факултет во Скопје. Тој беше оженет со Љубица и е татко на три ќерки. Почина по тешко боледување на 26 март 2018 година.
Канго почнал да се занимава со рок-музиката во раната младост, а во 2005 година го прославил 40-годишниот јубилеј со концерт во Домот на АРМ во Скопје. Во неговата долга музичка кариера, свирел заедно со скоро сите музичари од неговиот град и пошироката околина. Канго бил гитарист, текстописец, аранжер, композитор и продуцент на неговата истоимена група, која работела во формацијата: гитара/вокал, бас гитара и тапани. Исто така, над 20 години, Канго бил сопственик на училиште за рок-музика каде го предавал своето искуство на помладите генерации.
Има издадено седум музички албуми: „Воскреснување“ (1991), „Вознесување“ (1994), „Реинкарнација“ (1995) – албум со преработки на песни на легендарниот гитарист Џими Хендрикс, „Вдахновение“ (1996), „Проповеди“ (1997), „Проповеди“ (1998) – компилација на најдобрите песни на Канго по повод 35-годишнината од неговата кариера, и „Откровение“ (2007). Покрај многуте концерти во Македонија, Канго настапил на Заечарската гитаријада во 1994 и 2001 година, а има одржано концерти во Нови Сад и во Белград (2004), како и во Виена (2004).
Канго е автор на четири збирки поезија:
„Воскреснување“ (1988),
„Вознесување“ (1989),
„Вдахновение“ (1990),
Поемата „Распетие“ (1997).
Со своето движење „Мактеон“, Канго организираше повеќе македонски космополитски средби, како и чествувања по повод раѓањето на Александар Македонски на наоѓалиштето Горно Гратче, на планината Осогово, во близината на Кочани.
Податоците во текстот се преземени од биграфијата на Канго.