Вие сте на официјалниот портал на Радио Кочани.
Градот Кочани одбележал една година од трагедијата со пожарот во дискотеката „Пулс“, во која загинаа 63 лица, а 193 млади биле повредени.
Градоначалникот Владко Грозданов на централниот настан „Кочани Ви благодари“ им се заблагодарил на лекарите, медицинските тимови, волонтерите, амбасадите и државните институции кои помогнале во спасувањето и лекувањето на повредените.
Во говорот истакнал дека во моментите на трагедијата градот не останал сам, бидејќи болници од државата и од други европски земји ги примиле повредените, а транспортот се вршел со амбулантни, полициски и армиски возила, како и со хеликоптери и авиони.
Општина Кочани доделила благодарници на 36 болници од странство, амбасади и институции. Претставник од болницата Пирогов симболично му предал клуч од болницата на градоначалникот како знак на солидарност.
На настанот присуствувале и министрите Панче Тошковски, Игор Филков и Азир Алиу.
Во рамки на одбележувањето имаше и музичко-сценски настап со учество на пијанистот Симон Трпчески и оперскиот пејач Игор Дурловски.