ОИК на Кочани и Чешиново-Облешево ги доделија уверенијата на новите советници и на градоначалниците Грозданов и Костадинов

Општинската изборна комисија – Кочани денеска ги додели уверенијата на новите 19 членови на Советот на Општина Кочани, како и на новоизбраниот градоначалник, д-р Владко Грозданов.

Настанот се одржа во просториите на општинскиот совет.

Претседателката на ОИК – Кочани, Билјана Димовска Гичева посочи дека со ова официјално завршува изборниот процес и им посака успешен и одговорен мандат на сите новоизбрани функционери.

Советот на Општина Кочани во наредниот четиригодишен период ќе брои 19 членови, од кои девет се од ВМРО ДПМНЕ и коалицијата „Твоја Македонија“, четири од група избирачи Благица Сабовкевиќ Стоименова, тројаца од СДСМ , двајца од група избирачи Влатко Здравко, еден од Движењето ЗНАМ, како и Аки Акиов, предложен, исто така од група избирачи.

По добивањето на уверението, новоизбраниот градоначалник д-р Владко Грозданов им се заблагодари на граѓаните за довербата и најави посветена работа на проекти кои ќе го развиваат Кочани во економска, инфраструктурна и социјална насока.

Со денешниот чин, Општината влегува во нов мандатен циклус, кој ќе започне со конститутивната седница на новиот Совет, на која ќе бидат потврдени мандатите и избрано раководството.

Исто така, денеска и Општинската изборна комисија на Чешиново-Облешево им ги врачи уверенијата на новоизбраните 11 членови на Советот на општината, како и на новоизбраниот градоначалник Јорданче Костадинов.

По свеченото врачување на уверенијата, досегашниот градоначалник Далибор Ангелов официјално му ја предаде градоначалничката функција на својот наследник Костадинов, со што беше означено и формалнато примопредавање на власта во општината.