Вие сте на официјалниот портал на Радио Кочани.
Од сцената во Кочани, град кој во последно време претрпе многу, пристигнува звук кој е истовремено и рана и лек… Младиот бенд „Корка“ со своето дебитантско ЕР, „Болестите на денешнината“, испорачува бучна, сирова и бескомпромисна доза на нојз рок која е болно потребна на македонската сцена. Целосно снимено и продуцирано во „направи сам“ (DIY) манир, ова издание е автентичен крик на една генерација, фатен во својата најчиста форма – пишува порталот Арно.мк за „Корка“, кочански млад бенд кој се појави на алтернативната сцена кај нас пред две години.
„Корка“ го сочинуваат Ненад Стојанов, Давид Лазаров, Анастасија Стоименовска, Борис Медарски и Викторија Петрова. Во првиот состав на тапани свиреше Сара Јорданова, која за жал, несреќно животот го загуби во пожарот од 16 март годинава.
„Корка“е нојз рок бенд од Кочани кој во својот звук комбинира суровост, енергија и тематска апатија што ја отсликува реалноста на младите денес. Со изразена DIY естетика, мрачна атмосфера и текстови што се движат од апсурд до социјален коментар, ‘Корка’ остава впечаток како еден од најсвежите гласови на македонската алтернативна сцена“, велат од иницијативата Млади за Скопје, во чија организација составот од Кочани имаше концертна промоција на нивниот деби истоимен албум во „Ла Кања“ во Старата скопска чаршија на 14 јуни.
Она што го издигнува ова (дебитантско ЕП, насловено „Болестите на денешнината“) издание над обичен збир на бучни песни е длабоката емотивна тежина. Во нивните текстови и атмосфера се чувствува доза на резигнираност, безнадежност и темнина – можеби директен одраз на реалноста во нивниот град, но и метафора за состојбата во целата држава. Иако нивната ангажираност можеби не е свесна или намерна, таа е апсолутно искрена.
„Корка“ не држат политички говори; тие едноставно ја документираат својата реалност, а тоа е најсилниот ангажман од сите, стои во текстот за нив во Арно.мк.
Од било кој агол да се погледне „Корка“ навистина остава впечаток како еден од најсвежите гласови на македонската алтернативна сцена.
И, дефинитивно „Корка“ е наша, кочанска и македонска, нова урбана приказна, што ветува…