Вие сте на официјалниот портал на Радио Кочани.
Денеска во пониските одделенија на ОУ „Раде Кратовче“ претставници на Пчеларското здружение „Матица“ од Кочани одржаа час по пчеларство.
Борчо Атанасов и Станче Василов пред учениците зборуваа за значењето на пчелата за човекот и животната средина. Во приликава двајцата покажаа дел од пчеларската опрема и како таа се користи.
Повод за одржувањето на овој час беше претстојниот Ден на пчелата, 20 – ти мај.
Меѓународен ден на пчелата e меѓународен празник кој во светот се слави на 20 мај, роденденот на Антон Јанша, основоположникот на модерното пчеларство (1734-1773).
Празнувањето на Меѓународниот ден на пчелата има за цел да посочи на огромната улога што ја имаат медоносните пчели во опрашувањето на растенијата, добивање мед и други пчеларски производи : матичен млеч, пчелин восок, прополис…
Здружението „Матица“, 20 -ти мај ќе го одбележи на посебен начин, со изложба на слики, цртежи и книжевни творби на ученици од кочанските основни училишта. Овој настан се организира во соработка со ЦК „Бели мугри“.
