Кочани застана во тишина: Почит за 62-те млади животи згаснати во „Пулс“ од над 300 велосипедисти…

Точно во 12:05 часот, Кочани застана. Пред зградата на некогашната дискотека „Пулс“, граѓани, родители и спортисти оддадоа почит на 62-те млади животи изгубени во трагичниот пожар на 16 март. Едноминутниот молк беше симбол на задоцнетата институционална реакција, но и гласна порака за правда и одговорност.

Во заедничка акција, локалната самоуправа и родителите на настраданите организираа велосипедска тура во која учествуваа над 300 учесници. Меѓу нив беа и тркачи, деца и млади спортисти.

„Дали навистина треба трагедија за да се сплотиме? Да си бидеме поддршка, да сме заедно? Овде сме, не се откажуваме, ќе се бориме. Заслужуваме одговори и ќе инсистираме на нив,“ изјави Жаклина Пауновска-Ангеловиќ,овластен сообраќаен инспектор во Општина Кочани .

Тишина што зборува повеќе од зборови

Градот и по речиси два месеца останува завиен во болка. Кочанчани велат дека ќе бидат потребни години, можеби и децении, за животот да се врати во нормала. Трагедијата остави неизбришлива рана, а спомените за младите што ги загубија животите, сѐ уште се свежи.

„Безбедноста ни е приоритет. Многу мали деца се дел од дефилето, мораме да бидеме внимателни,“ рече еден од родителите организатори.

Истрагата во тек – одговорноста сѐ уште недостижна

Како што претходно информираше јавниот обвинител Коцевски, истрагата за несреќата во дискотеката „Пулс“ е во завршна фаза и се очекува да биде комплетирана до 17 јуни. На случајот работат 13 јавни обвинители, а моментално истрагата се води за кривично дело – „тешки дела против општата сигурност“.