Вие сте на официјалниот портал на Радио Кочани.
Производителите на ориз од Кочани и Кочанско добиле најава дека новата цена на оризовата арпа до крајот на неделата ќе биде корегирана. Според нив, ова е резултат на остварената средба со надлежните од Министерството за земјоделство, шумарство и водостопанство. Оризопроизводителите бараат цена од 27 денари за килограм арпа.
Пред 7-8 дена тие се заканија со протести и блокади на патиштата, бидејќи сегашната производна цена на арпата од 23 денари за килограм е премногу ниска. Во моментов, откупувачите плаќаат 18 до 20 денари за килограм, поради што проценките велат дека едвај 5% од минатогодишното производство е откупен.
-Ова што се случува со откупот е катастрофа. Во амбарите речиси ни стои целата реколта од 2025. Дали 5% е откупено. Откупувачите не откупуваат, а ние сме доведени во многу тешка ситуација. Ние баравме откупна цена од околу 40 ден. за килограм арпа, бидејќи и ние земјоделците работиме со некаква добивка, вели Тони Максимов од Национална мрежа на земјоделци.
Кочанските оризопроизводители сметаат дека без редовен и организиран откуп, оризот и понатаму ќе остане непродаден.
-Со редовен откуп да започнат откупувачите, бидејќи и да имаме цена, доколку откупувачите не ни го земаат родот, оризот повторно ќе ни стои во амбарите. Како што реков, само 5% од производството е откупено, и тоа по основ на тоа што откупувачите им имат дадено репроматрејали на производителите. Значи само си го наплаќаат тоа што го дале, а откуп не се врши, рече Максимов.
Според проценките, минатата 2025 година во Кочани и регионот се произведени помеѓу 20 и 24 илјади тони оризова арпа.