Кочанчанецот Владимир Грчев повторно е државен првак по информатика!

Деветооделенецот Владимир Грчев повторно ја освои титулата државен првак по информатика, овој пат како ученик од ООУ „Братство“ – Карпош- Скопје, под менторство на наставничката Ана Дионисиева.

Покрај тоа, тој постигна извонреден успех и во вкупниот пласман на натпреварот, освојувајќи го третото место меѓу сите учесници од основно и средно образование. Пред него се најдоа само двајца ученици од средно образование – еден од втора година и еден од трета година.

Браво, Владимир! Продолжи да не правиш горди, претставувајќи го најдобро и градот Кочани од каде што доаѓаш, училиштето и општината во кои учиш, но и нашата Македонија на меѓународните натпревари што те очекуваат истакна – Анита Атанасова – Грчев.

Дополнително, следниот месец Владимир ќе ги претставува боите на Македонија на IATI – Интернационалната олимпијада по информатика, што ќе се одржи во Шумен, Бугарија. Ова е уште еден доказ за неговата извонредна посветеност и талент во областа на информатиката и се надеваме  дека и таму ќе постигне успех.

Владимир изрази голема благодарност до ООУ „Братство“ – Карпош- Скопје, и до неговиот ментор, наставничката Ана Дионисиева, за поддршката што му ја дава во неговиот успех. Тој исто така искажува благодарност и до наставничката Нада Давиткова од Кочани, која до пред една година беше негов ментор и голема поддршка.