Вие сте на официјалниот портал на Радио Кочани.
Возило на АРМ се превртело кај Соколарци на патот Штип-Кочани, едно лице потешко повредено
Едно лице е потешко повредено во сообраќајна незгода што се случи кај надвозникот кај Соколарци на експресниот пат Штип – Кочани. Во сообраќајната несреќа едно возило на АРМ се превртело на коловозот.
Од Армијата потврдија дека се случила сообраќајна незгода, но повеќе детали најавуваат за подоцна.
Повредениот од болницата во Кочани е префрлен во болницата во Штип.
Поради сообраќајна несреќа што се случила околу 13 часот во прекин е сообраќајот за сите возила, а сообраќајот се пренасочува по локалниот патен правец од Соколарци кон Кочани и обратно.
Сообраќајот се пренасочува по стариот пат Штип-Кочани и по околните патни прaвци.
Официјално соопштение од МВР:
Денеска (21.03.2025) околу 13.00 часот во Полициската станица Кочани било пријавено дека на експресниот пат Штип – Кочани, помеѓу пробиштипска клучка и спанчевска крстосница, се случила сообраќајна незгода помеѓу патничко возило „фолксваген голф“ со винички регистарски ознаки и товарно возило сопственост на Армијата на РСМ. Притоа, пет лица се здобиле со повреди, од кои четири се пренесени во болницата во Кочани и едно во Клиничка болница Штип. Увидот е во тек.