Вие сте на официјалниот портал на Радио Кочани.
Голем број граѓани од северозападниот дел на Кочани утрово се јавија во нашата редакција видно изреволтирани и вознемирени од чадот и смрадот што синоќа го дишеа во своите домови.
Несразмерно топлото време и отворените прозори и тераси како да беа мамка за тивкиот ветер да го темпира чадот внатре, во куќите и станбените објекти. Буквално не се дишеше, ни рекоа. Исплашени сме и од канцерогениот состав на се она што согорува на депонијата.
Инаку, како што сите добро знаеме, овој проблем со кочанската депонија не е од вчера. Вчера само се прелила чашата. Во неколку наврати КЈП „Водовод“ и надлежните од Општината постапија за негово решавање со носење камиони со песок до запалените локации, што даде првичен резултат, но треба да продолжи се до конечно гаснење и задушување на штетниот чад.
Невладината ГРИН ОРГ дури излезе и со предлог за поставување на наплатна рампа до самата депонија, а со случајот е запознаен и народниот правобранител. Сепак, сите се сложуваат дека најдоброто решение е дислокација на отпадот од кочанско во регионалната депонија во светиниколско, после селото Мечкуевци, која би требало да профункционира, да се надеваме што поскоро.